بیدر۔ 22 اکتوبر ۔ ضلع بیدر میں گرام لیکھک (ولیج اکاؤنٹنٹ) اور اراضی پیمائش کار (لینڈ سروئیر) کے عہدوں پر راست بھرتی کے لیے 24 سے 27 اکتوبر 2026 تک 52 امتحانی مراکز پر مسابقتی امتحانات منعقد کیے جائیں گے۔ ایڈیشنل ڈپٹی کمشنر سریکھا نے متعلقہ افسران کو ہدایت دی ہے کہ امتحانات کو مکمل شفافیت، غیر جانب داری اور منصفانہ طریقے سے منعقد کرنے کے لیے تمام ضروری اقدامات کیے جائیں اور کسی بھی قسم کی بے ضابطگی کی گنجائش نہ چھوڑی جائے۔ جمعرات کو شہر کے ڈپٹی کمشنر دفتر کے کانفرنس ہال میں منعقدہ تیاریوں کے جائزہ اجلاس کی صدارت کرتے ہوئے انہوں نے کہا کہ امتحانات کے انعقاد میں کسی قسم کی کوتاہی یا بدنظمی سے بچنے کے لیے تمام متعلقہ محکمے باہمی تال میل کے ساتھ اپنی ذمہ داریاں انجام دیں۔انہوں نے بتایا کہ ضلع کے 52 امتحانی مراکز پر گرام لیکھک کے عہدوں کے لیے 11,581 اور اراضی پیمائش کار کے عہدوں کے لیے 3,365 امیدوار امتحانات میں شرکت کریں گے۔ امتحانات کے منظم انعقاد کے لیے پہلے ہی پانچ اہم کمیٹیاں تشکیل دی جاچکی ہیں۔ اس کے علاوہ روٹ افسران، مبصرین، ڈریس کوڈ کی نگرانی کرنے والے افسران اور فلائنگ اسکواڈ کی ٹیمیں بھی تعینات کی گئی ہیں۔ ایڈیشنل ڈپٹی کمشنر نے کہا کہ تمام ٹیمیں شفافیت کے ساتھ اپنی ذمہ داریاں انجام دیں اور امتحانی عمل میں کسی بھی قسم کی خامی نہ رہنے دیں۔ امیدواروں کے لیے مقررہ ڈریس کوڈ پر عمل درآمد یقینی بنانے کے لیے متعلقہ افسران کو ذمہ داری سونپی گئی ہے۔ امتحانی مراکز کے اطراف دفعہ 144 کے تحت امتناعی احکامات نافذ کیے جائیں گے۔ تمام مراکز میں سی سی ٹی وی کیمرے نصب کرنے کے ساتھ اطراف میں سگنل جیمرز لگانے اور امیدواروں کی تلاشی کے لیے فریسکنگ کا انتظام بھی کیا جائے گا۔ انہوں نے امتحانی کمروں میں مناسب روشنی اور پینے کے پانی کی سہولت یقینی بنانے کی ہدایت دیتے ہوئے کہا کہ امتحان شروع ہونے سے پہلے ہر کمرے کا اچھی طرح معائنہ کیا جائے۔ اگر کوئی خامی سامنے آئے تو فوری طور پر اعلیٰ افسران کے علم میں لاتے ہوئے اسے دور کیا جائے۔ امتحان کے لیے تعینات تمام افسران اور ملازمین کے لیے شناختی کارڈ پہننا لازمی ہوگا۔سریکھا نے متعلقہ حکام کو ہدایت دی کہ 24 سے 27 اکتوبر تک جاری رہنے والے امتحانات کے دوران تمام مراکز میں بلاتعطل بجلی کی فراہمی کو یقینی بنایا جائے۔ ہر امتحانی مرکز پر ایک طبی افسر، ڈی گروپ ملازم اور وہیل چیئر کی سہولت فراہم کی جائے۔ کسی بھی ہنگامی صورتِ حال سے نمٹنے کے لیے ایمبولینس اور فائر بریگیڈ کے انتظامات بھی تیار رکھے جائیں۔انہوں نے مزید کہا کہ امتحانات کے انعقاد میں تاخیر سے بچنے کے لیے سوالیہ پرچوں کو مقررہ وقت پر متعلقہ مراکز تک پہنچانا ضروری ہے۔ اس مقصد کے تحت ضلعی خزانے کے حفاظتی کمرے کو صبح 7 بجے کھولنے کی ہدایت دی گئی ہے، تاکہ سوالیہ پرچے مقررہ ضابطے کے مطابق متعلقہ مراکز کے روٹ افسران کے حوالے کیے جاسکیں۔اجلاس میں ایڈیشنل سپرنٹنڈنٹ آف پولیس چندرکانت پجاری نے یقین دہانی کرائی کہ امتحانات کے دوران جامع پولیس بندوبست اور ضروری حفاظتی انتظامات کیے جائیں گے۔ انہوں نے بتایا کہ امتحانی مراکز کے اطراف سگنل جیمرز بھی نصب کیے جائیں گے۔اس موقع پر محکمہ پری یونیورسٹی ایجوکیشن کے ڈپٹی ڈائریکٹر چندرکانت گھن شیٹی سمیت ضلع کے مختلف محکموں کے افسران اور دیگر متعلقہ عہدیداران موجود تھے۔
